Sakjane buku iki (30 Hari Keliling Sumatra) dudu buku sing pingin tak woco, dudu sing tak pesen soko penulise. Aku pingin moco buku TKI Di Malaysia, Indonesia Yang Bukan Indonesia sing sakdurunge tak woco resensine soko Om Ouda. Berhubung penulise sing seneng plus sering mecetat terpaksa aku kudu ngikhlasno buku trakhir soko cetakan pertama sing wes tak pesen dijupuk koncone pas penulise lagi “mlaku-mlaku” nang Jogja. Opo hubungane? Hubungane kene gak iso ketemuan polahe gak nemu jadwal sing tepak, akhire kedisikan wong liyo. Sing jelas akhire aku oleh buku iki, tak singkat ah cek keren, 30HKS.

Begitu buku iki teko aku langsung sujud syukur. Gak kok, biasa ae. Ngene ki lek podo tukang minggate, masio urip sak kutho tapi angel ketemu. Bukune gak tak jupuk dewe utowo diterno tapi dikirim lewat jasa pengiriman. Pertama mbukak langsung tak delok postere plus tambahan bonus kartu pos. Keren. Ndelok poto-poto nang postere langsung utekku mbayangno sing apik-apik. Mbayangno lek aku dewe sing moto, jelase yo sing mlaku-mlaku kliling Sumantra. Akhire mung iso misuh dewe karo gedek-gedek tapi gak athek ngiler. Pingin.

30HKS diawali crito tentang penulise sing oleh undangan mantenan soko koncone. Gak crito detil mantenane yok opo tapi luweh nyorot adat “beli mempelai laki-laki” utowo “nuku manten lanang” sing sik digawe nang kono, masio gak kabeh. Sebagian sing ngroso gak sreg karo adat iki akeh sing gak nggawe maneh, milih rabi karo wong luar daerah. Crito sakteruse lanjut perjalanane penulis “mlaku-mlaku” kliling Sumatra. Aku gak kate mbahas opo ae sing dicritakno penulis nang buku iki tapi luweh nang opo sing tak olehi sakwise moco buku iki.

Aku moco buku iki pas lagi nang perjalanan, numpak sepur. Akhir pekan sing jenenge sepur opo maneh ekonomi mesti ramene. Gak oleh lungguh iku biasa. Selama aku “upacara” nang sepur iku aku nutukno lekku moco buku iki. Opo penting? Penting lek gawe aku, polahe moco karo ngadek, diluk-diluk ditabraki asongan sing bola-bali lewat yo gak gampang. Suroboyo-Jombang, rong jam luweh akhire aku berhasil marekno buku iki. Intine sikil kemeng mergo ngadek gak kroso soale asik kegowo crito pas moco buku iki. Selain buku pelajaran karo majalah aku, enake ngomong, meh gak tau moco buku liyane fiksi. Gak seneng, gak tertarik, tapi moco buku 30HKS iki aku gak pingin mandek.

Aku wes biasa moco tulisan tentang catetan perjalanan mulai nang blog-blog utowo majalah tapi biasa sing diomongno mung biaya, penginepan, onok opo ae nang kono (objek wisata sing diparani) plus poto-poto sing akehe majang gambare penulise dewe. Lek niru omongane Bang Syam, sing nulis nang halaman ngarep dewe, pejalan iki gak sembarang pejalan, setuju banget. Penulis nang buku iki nyritakno opo sing gak biasa dicritakno penulis-penulis pejalan alias wong sing seneng mlaku (gak nemu istilahe, gawe dewe masio mekso). Hal-hal cilik sing seringe gak kepikiran nang utek lek lagi mlaku-mlaku dicatet trus dicritakno karo penulise.

Ngomongno teori aku gak ngerti, gak pantes ngomong secara yo gak duwe ilmune. Sing jelas moco 30HKS iki, sing dudu buku fiksi, utekku rasane melu miber, mlayang trus mandek nang nggon-nggon sing diparani penulise. Pas penulise ngroso luwe soale durung mangan kaet isuk, mung ngemut es krim plus panase howo karo sikile sing kemeng goro-goro mlaku iso tak rasakno. Iku sing bagian gak enak. Sing bagian enake, apike, pas penulise meneng, mandengi banyu nang Danau Lau Kawar sampek ngroso koyok onok kekuatan sing nyedot utowo pas de’e lagi nang makame Amir Hamzah mrenung, mbayangno penyair iku plus crito-crito nang jamane, roso-roso iku yo melu tak rasakno. Puitis, miris.

Lek onok sing rodo eman soko buku iki jelas iku mergo poto-potone sing burek, gak jelas. Tulisan sing wes apik, rodo keganggu karo cetakan poto plus buku sing kurang apik. Tapi lek kene moco temenan, aku yakin poto-poto iku gak patio penting. Penulis iso nggambarno opo ae sing didelok, dirungokno plus dirasakno slama perjalanane gawe boso sing mengalir enak. Sing gak kalah penting lewat buku iki, pengetahuan, pikiran utowo pandanganku sing selama iki gak akeh tentang Sumatra iso nambah. Terutama maneh masalah uwong-uwong plus adate. Gak koyok sing biasa tak tontok nang tipi utowo sing krungu-krungu nang berita, akeh nilai sing bakal gawe awake dewe sing moco mikir maneh, bener gak opo sing awake dewe pikirno slama iki tentang wong-wong iku.

Trakhir, pelajarane sing tak olehi soko moco buku iki yoiku ojo gampang percoyo karo opo sing tok tontok, rungokno sakdurunge ngrasakno dewe. Brarti gak oleh percoyo karo penulise buku iki la’an? Bukan gak oleh tapi lek jare koncoku “ojo percoyo karo penulis.” Opo aku ngomong lek penulise buku iki mbujuki? Dudu, gak koyok ngunu. Luweh tepate ojo percoyo karo tulisanku iki sakdurunge moco buku iki dewe. Lek masalah penulise mbujuk opo gak, yo takonono wonge dewe. Aku, koyok penulise buku iki, mung nulis opo sing tak rasakno. Sesuai karo judule iki dudu resensi. Iki mung coretane wong edan nggo wong sing seneng mlaku. Selamet gawe penulise, mbak Ary Amhir sing wes garai aku iri. Hidup mlaku-mlaku. (ditulis Rina Tri ‘ciploek’ Lestari)